Afþreyingarmöguleikar í Fjallabyggð eru fjölmargir og af ýmsum toga. Í Fjallabyggð eru tvö glæsileg skíðasvæði með lyftum: í Tindaöxl í Ólafsfirði og Skarðsdal á Siglufirði, sem er án efa meðal bestu skíðasvæða landsins. Skíðagöngubrautir eru fjölmargar, einkum í Ólafsfirði, auk þess sem svæðið í kringum Fjallabyggð er einstaklega hentugt til vélsleðaferða.

Tvö ferðafélög eru starfandi í Fjallabyggð, Top Mountaineering og Ferðafélagið Trölli, sem standa fyrir skipulögðum gönguferðum allt árið um kring. Fjölmargar skemmtilegar og vel merktar gönguleiðir eru í Fjallabyggð. Þær eru mislangar og miskrefjandi, svo allir ættu að geta fundið gönguleið við hæfi.

Skógræktin á Siglufirði er sannkölluð náttúruperla, hvort sem er að vetri eða sumri. Þar er kjörið að ganga um stíga eða njóta sín á bekkjum eða í lautarferð.

Tveir 9 holu golfvellir eru í Fjallabyggð, annars vegar Skeggjabrekkuvöllur í Ólafsfirði og hins vegar Golfvöllurinn á Siglufirði. Á báðum stöðum geta kylfingar spilað á skemmtilegum völlum í einstaklega fallegu umhverfi.

Ólafsfjarðarvatn er á náttúruminjaskrá, enda mjög sérstakt náttúrufyrirbrigði þar sem ferskt vatn flýtur ofan á söltu. Vegna þessara eiginleika vatnsins veiðast þar margar sérstakar fisktegundir. Vinsælt er að ganga eða hjóla í kringum vatnið, en það er um 13 km leið.

Oftast nær eru góðar aðstæður til seglbretta- og bátasiglinga á vatninu, en umferð mótorbáta er þó ekki leyfð. Þá er kjörið að skauta á Ólafsfjarðarvatni í fallegu veðri á veturna.

Mikið fuglalíf er við Ólafsfjarðarvatn, eins og reyndar víðast hvar í sveitarfélaginu, en fjölbreytt fuglalíf allt árið um kring er eitt af helstu einkennum Fjallabyggðar.

Fjallabyggð er Heilsueflandi samfélag og innan sveitarfélagsins er góð aðstaða er til íþróttaiðkunar og hvers kyns heilsuræktar.

Á bæði Siglufirði og Ólafsfirði eru 25 metra sundlaugar, með heitum pottum, gufubaði og öllu tilheyrandi. Í báðum bæjum er íþróttasalur og tækjasalur. Tveir golfvellir eru í sveitarfélaginu, á Siglufirði og Ólafsfirði. Aðalknattspyrnusvæði Fjallabyggðar er á Ólafsfirði en einnig er völlur á Siglufirði.

Ungmenna- og íþróttasamband Fjallabyggðar er starfandi í sveitarfélaginu. Innan vébanda þess eru starfandi tveir golfklúbbar, tvö hestamannafélög, tvö skíðafélög, tvö tennis- og badmintonfélög, knattspyrnufélag, skotfélag, ungmennafélag og íþróttafélag fatlaðra.

Auk íþróttafélaga innan UÍF eru starfrækt í Fjallabyggð tvö bridgefélög, sjóstangveiðifélag, blakfélag og skákfélag.

Nemendum í 1.-4. bekk grunnskóla gefst kostur á Frístund eftir skóla. Starfið er fjölbreytt og í samráði við íþróttafélög og tónlistarskóla. Akstur skólabíls tekur mið af starfi í Frístund.

Félagsmiðstöðin Neon er starfrækt fyrir börn og unglinga í Fjallabyggð. Þar er geta börn og unglingar tekið þátt í tómstundastarfi og verið félagslegu umhverfi á sínum eigin forsendum.

Tómstundafélög sem starfa innan sveitarfélagsins eru fjölmörg, allt frá góðgerðarfélögum, björgunarsveitum og slysavarnardeildum til kóra og kvenfélags, svo aðeins fátt eitt sé nefnt.

Dagdvöl aldraðra er starfrækt bæði á Siglufirði og Ólafsfirði. Í tengslum við hana er boðið upp á félagsstarf fyrir aldraða í sveitarfélaginu þar sem áhersla er lögð á samveru, næringu, hreyfingu, tómstundir og skemmtun.

Í Fjallabyggð er blómlegt menningarlíf. Fjöldi gallería er starfræktur í sveitarfélaginu og margar vinnustofur listamanna. Söfn og setur eru mörg, hvort sem er á sviði lista eða sögu, s.s. Síldarminjasafnið, Ljóðasetur Íslands og Pálshús, svo aðeins örfá séu nefnd.

Fjölmörg félagasamtök eru starfrækt í sveitarfélaginu og setja þau mikinn svip á bæjarbraginn með öflugu starfi og fjölbreyttum viðburðum. Árlega eru haldnar í Fjallabyggð veglegar fjölskyldu- og tónlistarhátíðir, íþróttaviðburðir og margt fleira sem fjöldi gesta sækir. Þá eru ótaldir fjölmargar uppákomur og viðburðir sem haldnir eru að frumkvæði fyrirtækja og einstaklinga í sveitarfélaginu.

Á hverju ári standa bæjaryfirvöld fyrir vali bæjarlistamanni Fjallabyggðar og úthluta styrkjum til ýmiss konar menningarverkefna.